Арганізацыя Solidarity with Belarus нядаўна абвесціла вынікі ўжо другога конкурсу на найлепшы газетны артыкул пра Беларусь. На конкурс было даслана 60 артыкулаў ад 36 журналістаў з 16 краінаў свету – ад Германіі і Румыніі да такіх экзатычных краінаў як Інданэзія і Кастарыка. Аднак найбольшая колькасць артыкулаў была дасланая журналістамі з Беларусі, Вялікабрытаніі і Польшчы. 

Задачай міжнароднага журы было выбраць аналітычныя артыкулы, якія прыносяць новую і цікавую інфармацыю пра Беларусь – краіну, якую часта называюць апошняй дыктатурай Еўропы. Усе артыкулы былі напісаныя для чытачоў па-за межамі Беларусі і для мэтаў конкурсу мусілі быць дасланыя ў ангельскай моўнай версіі.

Першае месца журы прысудзіла Міхалу Патоцкаму (Польшча) за аглядны артыкул Split Personality Intersection, надрукаваны ў польскай газеце Dziennik Gazeta Prawna, у якім аўтар пластычна апісвае выбраныя праблемы, якія паўстаюць перад сучасным беларускім грамадствам.

Ларэн Вінацье (Францыя) атрымаў другую прэмію за артыкул A Dictatorship’s Success Stories, які быў апублікаваны ў газеце The Global Journal. У сваім арыгінальным артыкуле аўтар на некалькіх канкрэтных прыкладах разбірае становішча мясцовага прадпрымальніцтва ў Беларусі.

Трэцяе месца заняў артыкул, прысвечаны сітуацыі палітычных вязняў. Яго аўтар – беларускі журналіст і рэдактар незалежнай газеты ”Наша Ніва” Андрэй Дынько. Артыкул з назвай Europe’s Last Dictatorship быў надрукаваны ў The New York Times.

З поўнай інфармацыяй пра конкурс і спісам усіх конкурсных артыкулаў можна азнаёміцца на вэб-сайце конкурсу.

У сераду 20 сакавіка ў Польскім інстытуце пройдзе паказ дакументальных фільмаў з гутаркай. Убачыць можна будзе дзве стужкі вытворчасці ТВ “Белсат”, прысвечаныя праблематыцы смяротнага пакарання і беларускага рэпрэсіўнага апарату, які прадстаўлены перадусім на прыкладзе справы аб выбуху ў мінскім метро ў красавіку 2011 г.

Праграма:

17:00

Прагляд дакументальных фільмаў ТВ “Белсат”

“Страх у краіне спакою” (рэж. Кацярына Бортнік, 2012 г., 43 хв.)

“Найвышэйшая мера” (рэж. Сяргей Ісакаў, 2012 г., 34 хв.)

18:30

Дыскусія на тэму дзейнасці ТВ “Белсат” і сучаснай сітуацыі ў Беларусі

У дыскусіі выступіць дырэктарка ТВ “Белсат” Агнешка Рамашэўска-Гузы і Пэтрушка Шустрава, публіцыстка і дырэктарка аб’яднання “Грамадзянская Беларусь”.

Фільмы і дыскусія будуць забяспечаныя перакладам на чэшскую мову, уваход вольны.17.00

Агнешка Рамашэўска-Гузы кіруе тэлеканалам “Белсат” з моманту ягонага заснавання ў 2007 годзе. Мэтай тэлеканала, супольна фінансаванага польскай грамадскай тэлевізіяй і Міністэрствам замежных справаў, з’яўляецца падтрымка дэмакратыі і грамадзянскай супольнасці ў апошняй еўрапейскай дыктатуры – Беларусі. „Мы намагаемся сеяць зярняты, – гаворыць Рамашэўска, – але што з іх вырасце, залежыць ад беларускага грамадства”. Некалькі тыдняў таму яна стала першым прадстаўніком Польшчы, якому часопіс Reader’s Digest прысвоіў тытул “Еўрапеец года”.

Арганізатары:

Польскі інстытут у Празе

Арганізацыя “Чалавек у нядолі”

Нядаўнія прэзідэнцкія выбары ў Чэхіі прыцягнулі ўвагу не толькі дзякуючы размаітаму выбару кандыдатаў і факту, што чэхі ўпершыню абіралі прэзідэнта прамым галасаваннем. Яны сталіся і прадметам цікавасці беларускай місіі назіральнікаў Belarus Watch, у якую ўвайшлі беларускія студэнты і прадстаўнікі няўрадавых арганізацый.

Доўгатэрміновая мэта праекту палягае не толькі ў наглядзе за ходам выбараў, але і ў тым, каб апасродкавана перадаць маладым беларусам досвед функцыянавання дэмакратыі ў еўрапейскіх краінах. Акрамя Belarus Watch, удзел у праекце таксама ўзялі Еўрапейскі гуманітарны універсітэт (ЕГУ) і Дома правоў чалавека ў Вільні.

Беларусы праводзілі назіранне цягам першага тура прэзідэнцкіх выбараў 11 і 12 студзеня. За два дні яны наведалі 182 выбарчых участкаў па ўсёй краіне. У Чэхіі не існуе традыцыі назірання на выбарах (напрыклад, на апошніх выбарах у Грузіі было зарэгістравана ў шмат разоў больш назіральнікаў, чым агульная колькасць выбарчых акругаў), і сам статус назіральніка акрэслены ў выбарчым заканадаўстве не вельмі падрабязна, што можна патлумачыць агульным даверам да справядлівага падліку галасоў.

Сябры місіі не заўважылі ніякіх спробаў фальсіфікацыі ці маніпуляцый галасамі і ў цэлым ацанілі ход галасавання як гладкі. Аднак справаздача аб ходзе назірання прыносіць некалькі цікавых канстатацый:

- Выбарчыя ўчасткі толькі зрэдку былі прыстасаваныя для людзей з абмежаванымі магчымасцямі, шмат выбарчых участкаў знаходзілася вышэй за першы паверх, што ўскладняла доступ пажылым грамадзянам.

- У некаторых выпадках выбарчыя ўчасткі былі перапоўненыя выбарцамі, што вяло да ўтварэння чэргаў у самім памяшканні і за дзвярыма. Было заўважана некалькі выпадкаў адкрытага галасавання: выбарцы ўкладалі выбарчыя бюлетэні ў канверты па-за шырмай, што пярэчыць патрабаванням заканадаўства. Сябры выбарчых камісій збольшага не перашкаджалі такім дзеянням.

- Скрыні для галасавання былі апячатаныя розным спосабам. У некаторых акругах на скрыні навешваліся замкі, у іншых не. Часам скрыні для галасавання былі толькі апячатаныя, прычым подпісаў сяброў выбарчай камісіі на пячатках не было. У некаторых выпадках у памяшканнях для галасавання былі заўважаныя неапячатаныя скрыні, якія, па словах сяброў выбарчых камісій, не выкарыстоўваліся, але існавала магчымасць іх пазнейшага злоўжывання. Місія лічыць, што працэдура апячатвання скрыняў для галасавання павінна быць падрабязна апісаная ў заканадаўстве.

- Пасля закрыцця выбарчых участкаў здаралася, што некаторыя выбарчыя камісіі не падлічвалі нявыкарыстаныя канверты. Паводле выбарчага заканадаўства, праверка нявыкарыстаных канвертаў павінна адбывацца перад падлікам галасоў. 

Беларускі рэжым па-ранейшаму трымае ў заключэнні шэраг палітычных вязняў на чале з кандыдатам на прэзідэнта Міколам Статкевічам, старшынёй моладзевай арганізацыі “Малады Фронт” Змітром Дашкевічам і праваабаронцам Алесем Бяляцкім .

Перадусім дзве першыя асобы ў дадзены момант знаходзяцца пад моцным ціскам з боку кіраўніцтва вязніцы. У рэакцыі на гэты факт узнікла анлайн-петыцыя, якая звяртаецца да прадстаўнікоў Еўразвязу з заклікам прыкладаць сістэматычныя намаганні, накіраваныя на падтрымку вызвалення ўсіх беларускіх палітычных вязняў. Падпісаць петыцыю можна тут.

Мікола Статкевіч – апошні з кандыдатаў на прэзідэнта на выбарах 2010 года, які дагэтуль знаходзіцца ў турме. Былы генерал арміі па-ранейшаму супрацьстаіць націску з боку рэжыму і адмаўляецца падпісаць прашэнне аб памілаванні. У студзені 2011 года Статкевіч быў асуджаны на тры гады турэмнага заключэння ў сувязі з пратэстамі супраць фальсіфікацыі прэзідэнцкіх выбараў. У траўні таго ж года за “арганізацыю масавых беспарадкаў” яго тэрмін быў павялічаны да шасці гадоў. 

Неаднойчы на працягу адбыцця пакарання яго змяшчалі ў адзіночную камеру і адмаўлялі ў медыцынскай дапамозе. На сённяшні дзень Мікола Статкевіч утрымліваецца ў ізаляцыі, наведванні яму дазволеныя толькі 1 раз на год.

Падтрымаць Міколу Статкевіча можна даслаўшы ліст на гэты адрас:

Статкевіч Мікала

турма № 4

вул. Крупскай 99А

212011 г. Магілёў

Зміцер Дашкевіч – беларускі палітычны актывіст. Яшчэ ў 2006 годзе быў асуджаны на 18 месяцаў турмы за “нелегальную палітычную дзейнасць”. Міжнародная арганізацыя Amnesty International прызнала яго вязнем сумлення.

За дзень да абвяшчэння вынікаў прэзідэнцкіх выбараў, 18 снежня 2010 г., Дашкевіч разам з актывістам Эдуардам Лобавым былі затрыманыя нібыта за напад на двух чалавек. У сакавіку 2011 г. Зміцер быў асуджаны на два гады пазбаўлення волі. На знак пратэсту супраць прысуду Дашкевіч неаднаразова трымаў галадоўку і, як і Статкевіч, адмовіўся падпісаць прашэнне аб памілаванні. У верасні яго двухгадовы тэрмін быў працягнуты на год за "сістэматычныя і агрэсіўныя парушэнні рэжыму".

Пісаць Змітру Дашкевічу можна на гэты адрас:

Дашкевіч Зміцер 

турма №1

вул. Кірава1

230023 г. Горадня

25 верасня ў Брне адбудзецца адкрыццё выставы Belarus Press Photo. Калекцыя ўключае ўсе ўзнагароджаныя фотаздымкі апошняга года. Сама выстава будзе праходзіць у Доме паноў з Кунштату (Dům pánů z Kunštátu, Dominikánská 9), наведаць яе можна будзе ў звычайны працоўны час (серада – нядзеля 10.00–18.00) да 7 кастрычніка. Плата за ўваход добраахвотная.

На імпрэзе можна падпісаць петыцыю арганізацыі Amnesty International за вызваленне несправядліва вязненага Алеся Бяляцкага. Рыхтуецца таксама збор плюшавых мядзведзікаў, якія з подпісам і заклікам да вызвалення канкрэтных вязняў і шанавання правоў чалавека будуць дасланыя беларускаму амбасадару ў Празе. Гэтая акцыя звязаная з інцыдэнтам, які адбыўся 4 ліпеня, калі двое сяброў шведскай рэкламнай фірмы Studio Total перасеклі на аднаматорным самалёце мяжу Беларусі з боку Літвы і скінулі на парашутах каля 800 плюшавых мядзведзікаў с цыдулкамі з патрабаваннем свабоды выказвання.

Выстава праходзіць у межах тэатральнага фестывалю сцэнічнага чытання твораў беларускіх драматургаў, арганізаванага тэатрам FESTE. Больш падрабязную інфармацыю можна знайсці на старонках тэатру.